Er Ajuntament de Bossòst a lançat ua campanha d’informacion, conscienciacion e avís sus era proïbicion de deishar es defecacions des cans ena via publica. Entad açò, eth consistòri a penjat pannèus informatius en diuèrsi punts deth pòble entà rebrembar aguesta proïbicion. Tanben a plaçat, enes darrèri dies, un punt pipican damb paperèra e dispensador de bosses tà facilitar era recuelhuda des excrements. Eth pipican se tròbe ena plaça centrica dera Hònt.

Era campanha, iniciada dejà ena primauèra, met en plaça era proïbicion, regulada pera Ordenança de Conviuença Ciutadana, de 28 de març de 2008, d’enlordir era via publica e, en generau, quinsevolh lòc public o destinat ath transit de passants. Segontes era normativa, es proprietaris an era obligacion de recuélher es defecacions. Er incompliment dera Ordenança pòt èster motiu de denóncia, damb era imposicion dera sancion corresponenta.