Tanben mòstre eth sòn supòrt ar autogovèrn aranés dauant era reforma dera Lei de Bases de Regim Locau

Eth Plen der Ajuntament de Bossòst a aprovat aué per unanimitat ua mocion presentada per equip de govèrn “contra era supression des municipis menors de 5.000 abitants, a favor d’un mielhor finançament municipau e en supòrt ara autonomia locau e ar autogovèrn aranés”, dempús des anoncis efectuadi peth Govèrn der Estat en relacion ara reforma dera Lei reguladora des Bases deth Regim Locau.

Eth tinent d’alcalde, Amador Marqués, a explicat que “aguesta ei ua mocion preventiva entà deféner era nòsta identitat municipau e hèr a arribar era nòsta propòsta tà esvitar duplicitats, mancomunar servicis e cooperar entre municipis, mès sense suprimir-les ne uedar-les de foncions a favor d’administracions que se volien racionalizar”, en referéncia as deputacions. Aguestes se veirien refortides damb atribucions extrètes des municipis menors de 20.000 abitants.

“En tot cas, auem de besonh un melhor finançament e cooperar mès entre administracions”, segontes Marqués. Era mocion da supòrt ar autogovèrn aranés e se mòstre contrari ath “tutelatge” des municipis petits, perque aguest non respectarie era garantia constitucionau d’autonomia locau n’eth principi de descentralizacion ena gestion publica.

MOCION CONTRA ERA SUPRESSION DES MUNICIPIS MENORS DE 5.000 ABITANTS, A FAVOR D’UN MIELHOR FINANÇAMENT MUNICIPAU E EN SUPÒRT ARA AUTONOMIA LOCAU E AR AUTOGOVÈRN ARANÉS

Dauant des anoncis que s’an produsit enes darrères setmanes e mesi en referéncia ara supression des municipis menors de 5.000 abitants der ensem der Estat espanhòl, d’acòrd damb era prepausa plantejada peth Govèrn der Estat,

Vista era prevision de reformar era Lei 7/1985, de 2 d’abriu, reguladora des Bases deth Regim Locau per part deth Govèrn der Estat en referéncia ara reduccion de competéncies des municipis menors de 20.000 abitants a favor deth reforçament des atribucions des deputacions provinciaus,

Vista era incertesa generada per anonci dera nomentada reforma dera Lei de Bases de Regim Locau en referéncia ath papèr qu’auràn de desvolopar a compdar d’ara es municipis e es institucions coma eth Conselh Generau d’Aran, maxima institucion d’autogovèrn,

MANIFESTAM

Eth nòste supòrt ara autonomia municipau e, en cas d’Aran tanben, ar autogovèrn qu’encarne eth Conselh Generau d’Aran, atau com ath besonh de racionalizar e optimizar era despena e es servicis que prèsten es municipis, en tot esvitar duplicitats que non son de besonh e en tot mancomunar servicis, mès sense besonh de suprimir es municipis.

Qu’eth nòste objectiu ei balhar un corrècte servici as ciutadans de forma responsabla e exigenta, en tot méter en valor era solidaritat, era cooperacion e eth trabalh en hilat, damb ua gestion mès agila, eficienta e eficaça,

Per aguesti motius, eth Plen der Ajuntament de Bossòst pren es següenti

ACÒRDS:

1. Plantejam ua oposicion frontau ara supression des municipis menors de 5.000 abitants, qu’en Aran representen era practica totalitat, a excepcion de Vielha-Mijaran, perque consideram qu’eth problèma non residís en numerò de municipis, senon ena superposicion des foncions e es nivèus diuèrsi des administracions.

2.  Proposam esvitar es duplicitats, mancomunar servicis, cooperar entre municipis e melhorar eth finançament des municipis, ja que representen era administracion mès propèra en atencion as problèmes des ciutadans e en favor dera coesion sociau d’un pòble.

3.  Mostram eth nòste desacòrd ath tutelatge que se vò aplicar contra es municipis petits e ara reduccion de competéncies des municipis menors de 20.000 abitants en favor deth reforçament des atribucions des deputacions provinciaus, atau coma ei plantejada actuaument, ja que, en lòc d’aprimar administracions dera dimension des deputacions, se les potencie encara mès en perjudici dera autonomia locau.

4. Demanam as govèrns der Estat espanhòl, era Generalitat de Catalonha e eth Conselh Generau d’Aran que respècten era garantia institucionau dera autonomia municipau, prevista pera Constitucion Espanhòla, atau coma ath principi de descentralizacion ena gestion publica.

5.  Mostram eth nòste supòrt ath Conselh Generau d’Aran coma maxima institucion d’autogovèrn en Aran e ath besonh d’un melhor marc de finançament que sigue capable de garantir damb es recorsi sufisents es servicis e es matèries dera sua competéncia.

6.  Er Ajuntament de Bossòst harà a arribar era presenta mocion as presidéncies des Govèrns der Estat, era Generalitat e eth Conselh Generau e as presidéncies deth Congrès des Deputats, eth Senat e eth Parlament de Catalonha, atau coma as Presidents des grops parlamentaris respectius.