En Aran, i a un CET que da trabalh a 16 persones

Er equip de govèrn der Ajuntament de Bossòst presentarà en pròplèu plen ordinari ua mocion de supòrt ath prètzhèt realizat pes Centres Especiaus de Trabalh e es servicis d’insercion ena empresa ordinària entara integracion en mercat de trabalh de collectius damb especiaus dificultats, d’acòrd damb es mocions aprovades peth Parlament e es Còrts espanhòles. D’aguesta forma, er Ajuntament se some ara demana deth sector entà qu’es Govèrns implicadi “garantisquen eth pressupòst de besonh entà mantier es lòcs de trabalh d’aguesti collectius damb especiaus dificultats”.

Era partida destinada a politiques actives d’ocupacion s’a vist redusida un 57 %, segontes eth Projècte dera Lei de Pressupòsti Generaus der Estat. Ua retalhada que, de concretar-se, afectarà es collectius damb risc d’exclusion e es persones damb discapacitat intellectuau, transtorn mentau o ua disminucion superiora ath 65 %, ei a díder, es mès vulnerables.

Era Val d’Aran compde damb un Centre Especiau de Trabalh, CET GOIARAN, e era Associacion de Discapacitats d’Aran (ADDA). Aguest centre da trabalh coma mieja annau a 16 persones dera Val d’Aran, 13 d’eres damb bèra discapacitat, tant fisica e intelletuau, coma mentau. Eth CET, que dauric es pòrtes en 1999, se pòt veir afectat un aute còp de manèra drastica damb era retalhada anonciada.

Per aguest motiu, er Ajuntament instarà ath Govèrn der Estat a “rectificar es pressupòsti damb er objectiu de garantir era continuïtat des servicis d’insercion laborau ena empresa ordinària e des Centres Especiaus de Trabalh, en tot establir es mesures de discriminacion positiva de besonh entad aguesti collectius especiaus e de mès grana dificultat, enes entitats sense interès lucratiu, e en tot instar, dera madeisha forma, ath Govèrn dera Generalitat entà complementar-les”, d’acòrd damb era propòsta presentada peth CET GOIRARAN e ADDA, en sintonia damb es CETs dera província e era Federacion ALLEM.