Er equip de govèrn vò “consens e participacion damb es vesins e eth sector”

Er Ajuntament de Bossòst a previst convocar enes pròplèu dies era comission redactora encargada de promòir un reglament entà regular era ocupacion dera via publica, d’acòrd damb era propòsta aprovada en plen municipau deth passat mes de seteme e dempús qu’eth Conselh Generau d’Aran age aprovat, eth passat diuendres, es directritzes entà terrasses plaçades en entorns d’interès patrimoniau.

Eth tinent d’alcalde, Amador Marqués, a explicat que “ara qu’auem es critèris sus era taula, era volentat der Ajuntament ei impulsar eth consens e era participacion damb es vesins e eth sector, en tot preservar er equilibri entre es principis d’accessibilitat e manteniment dera activitat economica”.

Era comission redactora ei formada per alcalde, eth tinent d’alcalde, eth còsso d’Urbanisme e Via Publica, un membre deth grop dera oposicion, un tecnic e eth secretari der Ajuntament e es presidents dera Associacion de Comerçants e Empresaris de Bossòst e deth Grèmi d’Ostalaria dera Val d’Aran (o persona en qui delèguen).